Danska liðið BMS Herlev er mætt í heimsókn til landsins með kvennaliðin sín í árgöngum 2009-2010 og 2011. Á morgun miðvikudaginn 11. febúar munu stelpurnar okkar í Njarðvík leika gegn þeim dönsku í Ljónagryfjunni kl. 15:45 og 17:15.
Njarðvíkurliðin hafa mætt BMS Herlev síðustu ár á Scania Cup og Danirnir jafnan með nokkuð sterka leikmannahópa hjá Herlev. Fyrri leikurinn á morgun kl. 15:45 er viðureign 2011 leikmanna (9. flokkur) en síðari viðureignin kl. 17:15 er viðureign sameiginlegra liða 10. flokks og leikmanna á fyrsta ári í 12. flokki (fyrsta ári í fjölbraut).
Eftir leikina á morgun verða stelpurnar frá Herlev gestir okkar Njarðvíkinga á viðureign Njarðvíkur og Ármanns í Bónusdeild kvenna sem fram fer í IceMar-Höllinni kl. 19:15. Við hvetjum Njarðvíkinga til að líta við í Ljónagryfjuna á morgun og sjá þessi skemmtilegu lið mætast í vináttuleikjum.
Mynd/ Frá einni af viðureignum Njarðvíkur og Herlev á Scania Cup frá árinu 2023
