Njarðvík mætir Tindastól á útivelli í Bónusdeild kvenna í kvöld. Leikurinn hefst kl. 19:15 í Síkinu á Sauðárkróki. Þetta er síðasti leikurinn hjá Ljónynjunum okkar fyrir jólafrí og tvö dýrmæt stig í boði sem fyrr í þessari jöfnu og spennandi deild.
Fyrir viðureign kvöldsins er Tindastóll í 8. sæti deildarinnar með 6 stig en okkar konur á toppnum með 18 stig en það er tólfta umferðin sem klárast í kvöld. Sigur í kvöld tryggir okkar konur einar á toppnum yfir jólahátíðina!
Eftir kvöldið í kvöld verður 12 leikjum lokið af 18 áður en deildinni verður skipt upp í A og B hluta. Fimm efstu lið deildarinnar verða þá í A hluta og næstu fimm í B hluta.
Viðureign kvöldsins verður í beinni frá Síkinu á SÝN Sport Ísland 2
Í gær lögðu stelpurnar af stað norður og gistu í Varmahlíð. Áður en þær héldu út á þjóðveg 1 stöldruðu þær við hjá Just Wingin it og fylltu á tankinn. Þökkum Justin Shouse og Lýði Vignissyni ásamt þeirra góða starfsfólki hjá Just Wingin it fyrir góðar móttökur.
Áfram Njarðvík!
#FyrirFánann
