KO í vesturbænumPrenta

Körfubolti

Íslandsmeistarar KR sendu í kvöld frá sér hávær skilaboð með öruggum 79-62 sigri á Njarðvík í fyrstu undanúrslitaviðureign liðanna í Domino´s-deild karla. Eftir öfluga 22-28 byrjun gestanna var sparslað upp í KR múrinn sem síðan hélt Njarðvík í samtals 16 stigum næstu tvo leikhluta! Lokatölur 79-62 og fjórði leikhluti var aldrei til umræðu. Njarðvíkingar eiga því þann vafasama heiður til þessa í úrslitakeppninni þetta tímabilið að vera það lið sem fæst stig hefur skorað í einum leik eða 62 talsins. Grindavíkingar voru fyrrum methafar með 65 stig í tapi gegn KR. Eins og vitað var fyrir leik var Pavel Ermolinskij ekki í búning hjá KR í kvöld svo Björn Kristjánsson mætti út á parketið í stöðu leikstjórnanda. Menn voru svo ekkert að tvínóna við hlutina, þristum rigndi eftir að Helgi Magnússon hafði sett veiðitímabilið í gang. Helgi skellti niður tveimur þristum og kom KR í 8-3. Darri setti einn, Bonneau var þegar búinn að koma niður einum og Hjörtur Hrafn lét líka ljós sitt skína. Svo virtist sem þeir Teitur og Friðrik væru einir eftir í að koma inná og spreyta sig við einn langdrægan. Heimamenn settu 17 stig á gesti sína fyrstu fimm mínúturnar en þá snéru Njarðvíkingar taflinu sér í vil með 5-16 spretti. Logi Gunnarsson var í virkilega fínum gír á báðum endum vallarins og sannkallað fjöregg þeirra Njarðvíkinga. Finnur Atli lenti í basli strax í fyrsta leikhluta er hann nældi sér í þrjár villur á fjórum mínútum og fór því minna fyrir honum þennan fyrri hálfleikinn. Það var svo Snorri Hrafnkelsson sem toppaði flottan fyrsta leikhluta hjá Njarðvík er hann skoraði í teignum um leið og flautan gall og Njarðvík leiddi 22-28 eftir fyrsta leikhluta. Gestirnir opnuðu annan leikhluta jafn vel og þeir lokuðu þeim fyrsta, settu 5-0 á KR og komust í 22-33 en þegar hér var komið við sögu voru vírarnir í díselvélinni farnir að hitna og maskínan fór að malla sinn eðalmjöð. Ef 80% þriggja stiga nýting í fyrri hálfleik er ekki „gourmet“ frammistaða þá skulum við bara ræða vörn þeirra KR-inga. Allt í lás og Njarðvíkingar komust hvorki lönd né strönd. Ef þeir grýttu ekki boltanum frá sér þá var það upp í hendur KR varnarinnar nú eða að fella sig við afar erfið skot. Mirko og Logi lentu vissulega í villuvandræðum og það sást bersýnilega með Loga utan vallar að hann virtist einn um að vera í rétta gírnum Njarðvíkurmegin. Nú ef 80% þriggja stiga nýting KR var ekki að svíða gestina þá hrökk Craion í gang og fór að setja niður teigskotin sem höfðu dansað af hringum í fyrri hálfleik. Helgi Magnússon kom KR í 48-36 með þrist, hvað annað, og þegar flestir héltu að Njarðvíkingar myndu eiga lokasóknina var annað uppi á teningnum því laglegt hraðaupphlaup KR þar sem Brynjar Þór kláraði með sniðskoti kom heimamönnum í 50-36 og þannig stóðu leikar í háfleik. KR vann því annan leihluta 28-8, rosalegur leikhluti! Skotnýting liðanna í hálfleik: KR: Tveggja 37,5% – þriggja 80% – víti 80% Njarðvík: Tveggja 56,2% – þriggja 33,3% og víti 50% Ef 28-8 leikhluti dugði ekki til að brjóta Njarðvíkinga þá voru upphafsmínútur þriðja leikhluta vel til þess fallnar. Brynjar Þór skellti niður þrist sem kom KR í 61-40 sem þýddi 11-4 byrjun meistaranna í síðari hálfleik og munurinn kominn yfir 20 stig. Menn eiga ekki afturkvæmt eftir svona hviður í DHL-Höllinni og þannig var það nákvæmlega fyrir gestkomendur í kvöld. Lokatölur 79-62 eins og áður greinir og á 20 mínútum í öðrum og þriðja leikhluta fór leikurinn 44-16 fyrir KR! Darri Hilmarsson er Lykil-maður leiksins að þessu sinni en hann var gríðarlega öflugur á báðum endum vallarins og kom það fáum á óvart í upphafi leiks að Darri skyldi vera settur til höfuðs Bonneau og komst einkar vel frá því verki. Það er reyndar liðsverk að hemja sóknarmann af tagi Bonneau en þar fór Darri fremstur á meðal jafningja. Crain hrökk af stað eftir hökt í byrjun og Helgi Magnússon var traustur frá upphafi. Brynjar Þór var einnig að hella dísel á færibandið og í svona langflestum tilvikum voru liðsmenn KR að gera einkar vel. Njarðvíkurmegin virtist Logi Gunnarsson einn manna gera sér grein fyrir hvað væri í vændum. Hann var ákafur frá fyrstu mínútu á meðan aðrir annað hvort heltust úr lestinni eða mættu ekki til leiks. KR-ingar sópa einvígið klárlega með þessum varnarleik en það er Njarðvíkinga að finna lykilinn að sigri og fá þeir annað tækifæri næstkomandi fimmtudag í Ljónagryfjunni. Lykil-maður leiksins: Darri Hilmarsson, KR Tölfræði leiksins Myndasafn – Bára Dröfn Umfjöllun/ Jón Björn Ólafsson Karfan.is