Jóhannes Albert Kristbjörnsson verður aðstoðarþjálfari Hallgríms Brynjólfssonar með kvennalið Njarðvíkur á komandi leiktíð. Þá mun Jóhannes einnig taka við þjálfun stúlknaflokks félagsins. Jóhannes mun fyrir hönd stjórnar KKD UMFN og unglingaráðs aðstoða við meistaraflokkinn sem og hafa yfirumsjón með elstu yngri flokkum félagsins og hlúa vel að tengingunni þar á milli.
Körfuknattleiksdeild Njarðvíkur fagnar því að fá jafn reyndan aðila um borð og Jóhannes sem hefur á síðustu árum verið viðriðinn þjálfun yngri flokka félagsins. Hann er margreyndur leikmaður og þjálfari og þá varð hann eins og flestum ætti að vera kunnugt margfaldur meistari með Njarðvíkurliðinu á sínum tíma.