Heimir Gamalíel Helgason var nýverið á meðal þeirra leikmanna í bandaríska miðskólaboltanum sem hlaut tilnefningu í hina frægu McDonals All American leiki. Núna er búið að velja lokahópinn sem tekur þátt og náði Heimir ekki þar inn en tilnefningin sjálf er risavaxin viðurkenning þar sem aðeins 300 bestu miðskólaleikmenn Bandaríkjanna fá tilnefningu í leikinn.
Eftir að tilnefningarnar eru birtar eru svo valdir 24 leikmenn úr karlaflokki (austur og vestur) og 24 leikmenn úr kvennaflokki (austur og vestur) með 12 í hverju liði. Heimir sem leikur með North Tampa Christian Academy hefur þegar valið sér háskóla en eins og við höfum áður greint frá er hann á leið í háskólanám hjá UMass þegar hann útskrifast úr miðskóla.
Í nokkra áratugi hafa McDonald´s All American leikirnir verið sýningarleikir sem skipuð eru liðum með bestu leikmönnum miðskólabóltans hverju sinni (high school). Hamborgarakeðjan McDonalds kemur inn í myndina árið 1977 en fyrir það var mótið hugsað fyrir bestu leikmenn í miðskólanum á svæðinu í kringum höfuðborgina, Washington. Þúsundir leggja leið sína á leikina og er miklu af ágóða verkefnisins ráðstafað í góðgerðarmál í gegnum Ronald McDonald House of Charities.
Skemmtileg viðurkenning á körfuboltaferli Heimis að fá tilnefningu í McDonalds All American leikinn en þeir sem vilja kynna sér það verkefni nánar geta skoðað sig hér um á heimasíðu verkefnisins.