Sundfólkið stóð sig velPrenta

Sund

Sundfólk ÍRB vann til fimm Íslandsmeistaratitla um helgina. Jafnframt unnu þau til fjögurra unglingameistaratitla og tveir liðsmenn náðu inn í verkefni sumarsins NÆM og EMU. Þrenn aldursflokkamet í flokknum 13-15 ára voru slegin af yngri karla boðsundsveitinni okkar.

Eva Margrét Falsdóttir varð þrefaldur Íslandsmeistari í kvennaflokki, hún sigraði í 200m bringusundi, 400m fjórsundi og 200m fjórsundi.

Guðmundur Leo Rafnsson varð tvöfaldur Íslandsmeistari í karlaflokki, hann sigraði 100m og 200m baksund. Í 200m baksundi náði hann lágmarki á Evrópumeistaramót unglinga með afar góðu sundi. Guðmundur Leo varð jafnframt þrefaldur Íslandsmeistari unglinga eftir úrslit í undanrásunum. Þar varð hann unglingameistari í 50, 100 og 200m baksundi.

Ástrós Lovísa Hauksdóttir tryggði sér þátttökurétt á Norðurlandamóti æskunnar með flottum sundum í 100 og 200m baksundi.

Sunneva Bergmann Ásbjörnsdóttir varð Íslandsmeistari unglinga í 400m fjórsundi.

Fjöldamörg verðlaun unnust af okkar fólki á mótinu og margir voru að bæta sína bestu tíma.