Lára Ösp á leið til Bandaríkjanna í námPrenta

Körfubolti

Þá er ljóst að þriðji leikmaður Íslandsmeistara Njarðvíkur er á leið til Bandaríkjanna í háskólanám en Lára Ösp Ásgeirsdóttir er komin með háskólasamning vestra og fylgir því stöllum sínum Vilborgu og Helenu frá Njarðvík.

Lára Ösp var lykilmaður í meistaraliði Njarðvíkurkvenna á síðasta tímabili og því verður skarð hennar vandfyllt. „Ég er bara spennt að prófa eitthvað nýtt við góðar aðstæður. Mér líst mjög vel á þjálfarana og stelpurnar sem ég mun æfa og spila með,” sagði Lára í snörpu samtali við UMFN.is

Háskólasamningurinn er við Metropolitan State University of Denver eða MSU sem leikur í D2 háskóladeildinni sem er önnur deild NCAA keppninnar. MSU leikur í Rocky Mountain Athletic Conference í deildarkeppni NCAA.

Nokkuð er síðan að vitað var til þess að Lára Ösp ætti kost á því að fara til Bandaríkjanna í nám en það raungerðist á dögunum og því bíður þjálfaranna Rúnars Inga og Lárusar enn frekara verkefni við að endurskipuleggja meistaralið okkar Njarðvíkinga fyrir komandi átök næstu leiktíðar.

Vegni þér vel Lára Ösp – áfram MSU!

Frétt hjá MSU um komu Láru Aspar