Kristinn Pálsson hefur öðlast leikheimild á nýjan leik með Njarðvík í Domino´s-deild karla og verður því í búning í kvöld þegar Njarðvík tekur á móti Þór Akureyri. Formlegri þrautagöngu er því lokið og Njarðvík búið að greiða uppeldisbætur í dómi FIBA.
Körfuknattleiksdeild Njarðvíkur fór rakleiðis í lántöku vegna niðurstöðu dómsins en hið glæsilega framtak sem Lárus Ingi Magnússon gangsetti í gær hefur gert það að verkum að ríflega helmingur upphæðarinnar hefur þegar safnast sem er stórkostlegt. Fyrir það verður aldrei nógsamlega þakkað. Hátt í 100 einstaklingar hafa lagt félaginu lið við þessar aðstæður og mun stjórn vinna hörðum höndum að því að ljúka málinu sem fyrst og gera upp við lánveitendur.
Þá bíðum við spennt eftir leik kvöldsins enda verður aðgangur ókeypis í Ljónagryfjuna í kvöld þar sem fólk getur líka komið og gætt sér á ljúffengum borgurum fyrir leik. Þá munu iðkendur úr yngri flokkum Njarðvíkur taka þátt í upphitun leiksins og setja stórskemmtilegan svip á alla umgjörðina.