Njarðvíkurstúlkur hömpuðu í dag Íslandsmeistaratitlinum í fyrsta skipti eftir snarpa og skemmtilega rimmu við öflugt Haukalið. Lokatölur voru 76-62 og serían fór því 3-1 fyrir Njarðvík.

 

Frábær árangur hjá stúlkunum. Leikurinn í dag byrjaði með látum. Shanae kom með tvær eldsnöggar körfur að hætti hússins. Voru stúlkurnar komnar í 7-0 strax á upphafsmínútum leiks. Létu þær forystuna nær aldrei af hendi út allan leikinn, ef undan eru skyldir nokkrir stuttir kaflar í leiknum.

 

Það sem skóp sigurinn í dag frábær varnaleikur liðsins í síðari hálfleik. Rhodes klaraði síðasta leik fyrir Haukastúlkur og náði að koma í veg fyrir að Njarðvík hömpuðu titlinum og tækju seríuna 3-0. Petrúnella sá hinsvegar til þess að það endurtæki sig ekki í dag. Þær stöllur Petrúnella og Ingibjörg Elva skiptust á að gæta Rhodes í liði Hauka, sem hefur verið frábær í vetur. Hún sá hins vegar aldrei til sólar í síðari hálfleik. Skoraði aðeins tvö stig. Petrúnella átti frábæran dag eins og áður sagði.

 

Aðrir leikmenn spiluðu einnig góða hjálparvörn. Lele og Shanae áttu frábæran leik að vanda. Var Lele komin með tvennuna (10+ fráköst/stig) strax í fyrri hálfleik. Shanae var ófeimin að keyra upp að körfunni, dreifa boltanum vel. Ekki var áhorfendum grunlaust um að hún gengi ekki alveg heil til skógar. Það var þó ekki að sjá á leik hennar. Þá átti Ólöf Helga líka góðan leik í vörninni að vanda. Hún fór fyrir liðinu eins og sönnum fyrirliða sæmir. Að auki komu mikilvæg stig frá henni í sókninni. Þessi öflugi fyrirliði hefur oftar en ekki verið aðeins frá í sókninni í vetur. Ólöf steig upp í dag og setti mikilvæg stig í sókninni. Var ógnandi. Sýndi hún enn og aftur að þarna er á ferðinni gríðarlega mikilvægur leikmaður í liði Íslands og bikarmeistaranna. Hver hefði trúað því að þegar hún gekk til liðs við 1. deildar lið Njarðvíkur að fjórum árum síðar væri hún að hampa bæði Íslands og bikarmeistaratitlinum?

 

Leikmenn eins og Dalla og Harpa voru og ófeiminar við að taka skotin sín. Greinilegt að Sverrir hefur lagt á það áherslu fyrir leikinn að leikmenn tækju opnu skotin. Stundum hefur flæðið í sóknarleiknum dottið aðeins niður þegar allt traust hefur verið sett á Lele og Shanae í vetur. Eins og leikmenn hafi meira búist við að þær stöllur myndu klára sóknirnar. Í dag voru allir leikmenn hinsvegar klárir í bátana sóknarlega og tóku skotin þegar þau buðust.

 

Sjálfstraustið hjá liðinu hefur aukist gríðarlega síðan liðið mætti í fyrsta leik síðasta haust.  Körfuknattleiksáhugafólk ætti t.d. að leggja á minnið nöfn stúlkna sem hafa komið griðarlega sterkar inn í vetur.  Stelpur eins og Erna Hákonar, Eyrún Líf, Ína María, Sara Dögg og Andrea Björt, svo einhverjar séu nefndar.  

 

Í rauninni er hægt að hrósa Njarðvíkurliðinu öllu fyrir framlagið í vetur, erfitt að taka einhverja sérstaka út.  Leikmenn hafa komið af bekknum og snúið leikjum. Breiddin í liðinu er í raun orðin mjög góð. Sverri hefur tekist að finna hverjum leikmanni sitt hlutverk. Slíkt skiptir miklu máli.

 

Rúmlega 500 njarðvískir áhorfendur fögnuðu vel og innilega þegar lokaflautið gall í Schenker höllinni á Ásvöllum í dag. Áhorfendur hafa verið fjölmargir á leikjum liðsins í vetur og stuðningur góður. Hefur þeim farið fjölgandi jafnt og þétt eftir því sem liðið hefur á tímabilið.

Fæstir áttu í raun von á að Njarðvíkurliðið myndi vinna tvöfalt í ár. Liðið mætti til leiks í Ljósanæturmótið með ágætis hóp, en enginn bjóst þó við að liðið myndi sína meistaratakta á tímabilinu.

 

Í spá leikmanna,forráðamanna og þjálfara liðanna í Iceland Express deild kvenna í september, var Njarðvíkurliðinu spáð 5. sæti í deild. Ekki búist við að liðið myndi hafa það af í úrslitakeppnina.

 

Eftir fyrstu níu leikina á tímabilinu var liðið búið að vinna fjóra og kannski ekki margt í kortunum sem sýndi tvennu. Þá kom að leik gegn KR á útivelli í lok nóvember. Njarðvíkurliðið sigraði þann leik örugglega þar sem Erna Hákonar setti fjóra eftirminnilega þrista á upphafsmínútunum. Að margra mati var þessi leikur vendipunkturinn á vetrinum. KR stúlkum hafði verið spáð öðru af efstu sætunum fyrir mótið. Að sigra fullmannað KR lið örugglega á útivelli veitti liðinu greinilega mikið sjálfstraust og sýndi svart á KR hvítu að Njarðvíkurliðið var ekki síðra en liðin sem var spáð efstu sætum. í Kjölfarið fylgdi svo jólagjöf stúlknanna til stuðningsmanna, tæplega 40 stiga sigur á grönnum úr Keflavík!

 

Þar með var ljóst að liðið ætlaði sér ekki að gefa neinum neitt. Liðið vann sjö af næstu átta leikjum. Tapleikurinn var gegn Fjölni, þar sem hvorki Lele né Shanae voru viðlátnar.  Aðeins herslu muninn vantaði til að leggja lið Fjölnis með alíslensku liði.  Ekki er ur vegi að álykta svo að það hafi elft sjálfstraust stelpnanna til muna og það væntanlega komið þeim til góða þegar í alvöruna var komið.

 

Í bikarkeppninni var allt að gerast. Liðið vann Keflavík í átta liða úrslitum. Þurfti síðan að bíða lengi vel eftir úrskurði um hvort sigurinn stæði áður en hægt væri að spila undanúrslitaleikinn gegn Haukum (sem vannst á dramatískasta hátt sem hægt er) og svo sjálfan úrslitaleikinn gegn Snæfellingum í Laugardalshöllinni.

 

Úrslitaleikurinn var frábær skemmtun. Petrúnella steig upp í úrslitaleiknum með 18 stig. Margir töldu að nú væri ljónið ekki svangt eins og segir í Kardimommubænum þegar titill væri kominn í hús. Annað kom á daginn. Liðið hélt einbeitingu fram að síðasta leik. Rétt missti af deildarmeistaratitlinum eftir að hafa tapað gegn Fölni í einum af lokaleikjunum. Annað tap liðsins gegn Fjölnisstúlkum í vetur.

 

Athyglisverður leikur var í lokaumferðunum var gegn Valsstúlkum. Þar voru stúlkurnar komnar út í horn.  Lleikur svo gott sem tapaður gegn Valsstúlkum sem höfðu farið á flug þegar á leið mótið. 

Sverrir skiptir Shanae og fleirum úr byrjunarliðinu út og gaf bekknum tækifæri. Þær þökkuðu pent fyrir sig og sneru töpuðum leik á nokkrum mínútum í 76-74 sigur. Án nokkurs vafa einn af skemmtilegri leikjum liðsins í vetur. Lele átti þarna góðan leik að vanda. Hún tók stuttu síðar við verðlaunum sem besti leikmaður síðari hluta IEX deildarinnar og var vel að þeim titli komin. Leikmaður sem leggur sig alla fram. Atvinnumaður sem kann sitt fag. Gerir liðsfélagana betri, getur unnið leiki upp á sitt einsdæmi og fór fyrir liðinu með dugnaði sínum og elju.

 

Njarðvík dróst gegn Snæfellsstúlkum í 4. liða úrslitum. Hólmarar höfðu verið á mikilli siglingu eftir áramótin, fengið inn nýja leikmenn og virtust til alls líklegar. Sérstaklega á heimavelli. Njarðvík vann seríuna 3-1. Voru leikirnir allir bráðskemmtilegir og jafnir. Ingibjörg Elva hafði komið inn í liðið síðari hluta mótsins og mátti sjá í leikjum gegn Snæfelli að mikill styrkur var í komu Ingibjargar. Enn einn frábær varnarmaðurinn hafði bæst í hópinn hjá Sverri og Lárusi.

 

Á meðan Njarðvík var að vinna sig í úrslitaseríuna gerðu Haukastúlkur sér lítið fyrir og sópuðu Íslands og bikarmeisturum síðasta árs, ásamt nýkrýndum deildarmeisturum 3-0. Greinilegt var að Tierny Jenkins, hin nýi leikmaður Hauka var að smellpassa inn í lið Haukastúlkna.

 

Úrslitaserían við Hauka var síðan frábær skemmtun fyrir hina fjölmörgu áhorfendur sem mættu á leikina. Í stuttu máli sagt tóku Njarðvíkurstúlkur úrslitaseríuna 3-1 líkt og gegn Snæfellsstúlkum í undanúrslitum. Leikirnir gegn Haukum voru eins og gegn Snæfelli jafnir og skemmtilegir.

 

Þessu stutta uppgjöri yfir tímabilið sem er að líða er ekki hægt að ljúka án þess að tíunda þátt Sverris Þjálfara og Lárusar aðstoðarmanns hans. Liðið hefur í vetur tekið ótrúlegum framförum. Fyrir tímabilið var liðinu ekki spáð viðlíka velgengni og raunin hefur verið.

 

Allir leikmenn hafa lagt mikið á sig til að landa þessum árangri. Þjálfararnir hafa farið fyrir liðinu. Það hefur tekið miklum framförum eins og áður sagði. Einnig er áberandi hversu oft liðið hefur verið undir í leikjum lengstan part leiks, en hirt sigurinn þegar skammt lifði leiks. Bendir það til þess að leikmenn séu í gríðarlega góðu formi. Þá hafa þjálfararnir verið óhræddir við að gefa leikmönnum tækifæri.

 

Marg oft í vetur hafa leikmenn komið af bekknum og snúið leikjum. Margir hafa talað um að Njarðvíkurliðið sé fyrst og fremst byggt í kringum þær Lele og Shanae, enda frábærir leikmenn þar á ferð. Það er að vissu marki rétt. hins vegar má ekki gleyma að til þess að ná árangri þarf að spila sókn og það þarf að spila vörn og til að halda jafn góðu liði og Haukaliðinu í dag í 22 stigum í síðari hálfleik, þarf varnarvinnan að vera góð.

 

Petrúnella og Ingibjörg áttu frábæran leik í vörninni gegn Rhodes. Dalla og Harpa fengu oftar en ekki erfitt hlutskipti í vetur að gæta öflugra og reyndra leikmanna, sem þær leystu með miklum sóma. Það hefur ekki farið mjög hátt en Dalla er að spila á sínu fyrsta ári í efstu deild. Hún vann sér sæti í byrjunarliðinu og er mikilvægur hlekkur í þessu öfluga liði.

 

Njarðvíkurliðið er skipað blöndu af reyndum leikmönnum, ásamt mörgum stórefnilegum. Efniviðurinn í yngri flokkunum er mikill. Ber að þakka forráðamönnum félagsins sem hafa lagt rækt við að byggja upp kvennakörfuna í Njarðvík undanfarin ár.

 

Mörgum hefur þótt vanta að jafn sigursælt félag og Njarðvík skuli ekki hafa haft gott kvennalið í keppni. Lið hafa komið, náð árangri, en síðan horfið jafnharðan. Það hlýtur að vera mikil áskorun fólgin í að byggja á þann grunn sem búið er að vinna. Ungir og efnilegir leikmenn bíða eftir að fá tækifæri að spila með meistaraflokk félagsins.

 

Hvern langar ekki að upplifa vetur eins og þann sem nú er að líða?

 

Takk fyrir fábæran vetur stelpur!

 

Áfram Njarðvík!!

 

-JE