Þann 16. maí sl urðu íslenska drengjalandsliðið - U16 - Norðurlandameistarar er þeir sigruðu Svía 82-54 í Solna.  Þessi frábæri sigur og frammistaða liðsins vakti mikla athygli og við Njarðvíkingar áttum fimm fulltrúa í þessu liði.  Heimasíðan kastaði nokkrum spurningum á Einar Árna Jóhannsson þjálfara liðsins en hann er eins og flestir vita yfirþjálfari yngri flokka hjá UMFN.

Fyrst af öllu Einar, hvað hefur þetta lið verið lengi í smíðum?
Einsog þessu hefur verið háttað undanfarin ár þá tekur landsliðsþjálfari við hóp eftir úrvalsbúðir og ég hóf undirbúning fyrir U15 með tæplega árs fyrirvara svo ferlið fram að NM er í kringum tvö ár.  Við höfum reynt að nýta sumarið vel, sem og jólin og svo tímann eftir tímabil, fram að NM.  Við tókum þátt í alþjóðlegu móti í Danmörku fyrir ári síðan, þá sem U15 og svo nýttum við síðasta sumar, jólin og vorið til undirbúnings fyrir NM.

Varstu bjartsýnn fyrir NM?  Er þetta sterkur árgangur miðað við marga aðra á síðustu árum?
Ég trúði því já fyrir NM að við gætum farið alla leið en vissi sem var að Danir væru með mjög sterkt lið og Svíar eru alltaf sterkir.  Ég vissi því að margt þyrfti að ganga upp til að við næðum að verða Norðurlandameistarar.
Það hefur verið þónokkur trú á þessum árgangi í körfuboltasamfélaginu en það er svosem alltaf erfitt að bera saman við aðra árganga.  Oftast miða menn við ´82 árganginn sem hefur alið af sér marga af þeim allra bestu eins og Jón Arnór Stefánsson, Jakob Örn Sigurðarson, Hlyn Elías Bæringsson og Helga Má Magnússon en NM var ekki í þessu formi sem það hefur verið undanfarin 8 ár þegar þeir voru ungir.  Síðan verðum við að nefna þá árganga sem hafa náð að verða Norðurlandameistarar á síðari árum en drengir fæddir ´86 urðu meistarar í U18 árið 2004 sem og drengir fæddir ´88 þá í U16.  Árið 2006 urðu svo ´88 drengir aftur meistarar, þá í u18 og ´91 drengir urðu meistarar í U16 2007 og aftur í U18 í fyrra.  Þetta eru allt hópar sem hafa skilað mörgum frábærum leikmönnum sem eru í dag í kringum A landsliðið eða banka hressilega á dyrnar.
1994 árgangur þarf því að halda áfram að svara fyrir sig á komandi árum, jafnt í U18 sem og þegar kemur á fullorðins ár.

Hvað myndir þú segja að hafi einkennt þetta meistaralið okkar Íslendinga á dögunum?
Ofboðsleg samheldni og mögnuð liðsheild fyrst og fremst.  Ég vissi sem væri að þarna væru margir mjög sterkir einstaklingar en við þurftum að fá þá til að mynda sterka heild og þá þurfa einhverjir að bregða sér í önnur hlutverk en þeir eru vanir heima í héraði.  Frábær liðsandi innan sem utan vallar er svo stór partur af púslinu þegar menn ætla sér stóra hluti.

Mynd:  karfan.is - Einar Árni og leikmenn U16 fagna innilega Norðurlandameistaratitlinum.

Nú hefur þetta lið sigrað tvö mót – er eitthvað framundan hjá liðinu?
Liðið sigraði Copenhagen invitational í Danmörku í fyrra þar sem við unnum alla 5 leiki okkar og svo sigrum við alla 5 leikina á NM já.  Næstu skref hjá þessum drengjum er svo bara barátta fyrir því að komast í U18 á næsta ári en þá eru þeir á yngra ári.  Því miður leyfir efnahagsástandið ekki þátttöku íslensku liðanna á EM þessi misserin.

Hvernig voru Njarðvíkingarnir í liðinu að standa sig?
Þeir leystu sín hlutverk frábærlega.  Eins og ég sagði áður þá eru margir að glíma við önnur hlutverk en þeir hafa í sínum félögum og Njarðvíkingarnir leystu sitt með sóma.  Valur Orri var fyrsti leikstjórnandi og átti mjög gott mót, og steig sérstaklega upp í leiknum gegn Dönum og var svo besti maður liðsins í úrslitaleiknum.  Maciej var að byrja sem framherji og var liðinu gríðarlega mikilvægur.  Hann var nokkuð stöðugur í stigaskori og frákastabaráttunni.
Dagur var að koma af bekknum og lék að jafnaði um 20 mínútur á leik og hann lék stórt hlutverk varnarlega í þessu liði og tók svo af skarið sóknarlega á réttum augnablikum.  Hann átti frábæra innkomu gegn Norðmönnum þar sem hann skilaði 16 stigum og 7 fráköstum á 19 mínútum.  Elvar Már var þriðji leikstjórnandi og kom minna við sögu en leysti sitt með sóma.  Hann er sterkur karakter og þó mínúturnar væru ekki eins margar og hjá hinum Njarðvíkingunum þá var hans hlutverk stórt í þessu meistaraliði !

Mynd:  karfan.is - Njarðvíkingarnir Maciej, Valur Orri, Elvar Már og Sigurður Dagur eftir úrslitaleikinn við Svía.

Svona að lokum, hvað hafði íslenska liðið sem hin liðin höfðu ekki?
Ég skal ekki segja til um hvort hin liðin hafi ekki haft marga af þeim þáttum sem ég tel að vegi þungt í velgengni sem þessari.  Þessir drengir hafa mikinn sjálfsaga og létu ekkert trufla einbeitingu sína í þessu móti.  Þeir lögðu allt í að kreista fram allt það besta úr sjálfum sér með því að huga að hvíld, mataræði og einbeitingu á verkefnið.  Þeir voru eins og ég kom inná áður mjög samheldnir í einu og öllu og sáu menn hversu mikið lið þeir voru hvort sem það var við morgunverðarborðið á hótelinu eða í leik á vellinum.  Umfram allt höfðu þeir risastórt hjarta, börðust gríðarlega, höfðu gaman af því sem þeir voru að gera og trúðu allan tímann að þeir gætu unnið gullið.

Mynd:  karfan.is - ósvikin gleði í leikslok !

Heimasíðan óskar Einari Árna og ekki síður drengjunum, bæði Njarðvíkingunum fjórum og öðrum leikmönnum liðsins innilega til hamingju með Norðurlandameistaratitilinn og hlakkar til að fylgjast með þessum drengjum í náinni framtíð.

ÖK