Risaslagur nágrannanna í kvöld!

Það verður sannkallaður risaslagur í Toyota höllinni í Keflavík í kvöld þegar okkar menn fara yfir lækinn og mæta Keflvíkingum í Iceland Express deild karla.  Einungis 3 umferðir eru eftir og deildin sem fyrr æsispennandi og skemmtileg.   Ávallt er hart tekist á í þessum leikjum en þessi er þó sérstaklega mikilvægur þar sem bæði lið eru að berjast á toppi deildarinnar og eru hnífjöfn.

Bæði lið eru eins og fyrr segir jöfn með 28 stig eins og Grindvíkingar en okkar menn sigruðu fyrri deildarleik þessara liða 76-63 í Ljónagryfjunni.   Keflvíkingar komu fram rækilegum hefndum í 8-liða úrslitum Subway bikarkeppni KKÍ þegar þeir kjöldrógu okkar menn á sunnubrautinni í janúar 93-73.  Leikur sem ætti að kveikja í okkar mönnum fyrir rimmuna í kvöld!

Mikilvægi leiksins í kvöld er gríðarlegt enda eru bæði lið að berjast um toppsætin í deildinni og eins og ávallt má búast við gríðarlega hörðum leik.  Vonandi verður leikurinn jafn og skemmtilegur en undanfarnir nágrannaslagir þessara liða hafa verið frekar ójafnir, þ.e.a.s annað hvort liðið hefur sigrað nokkuð sannfærandi.  Áhorfendum þyrstir í  einn klassískan spennuleik til þess að gíra sig upp fyrir úrslitakeppnina en auðvitað viljum við fyrst og fremst sigur okkar manna.  Nokkuð ljóst er að bæði lið koma til með að selja sig dýrt í leiknum í kvöld, stutt er í úrslitakeppnina og ekkert nema úrslitaleikir eftir í deildinni.

Þegar 3 umferðir eru eftir eiga okkar menn eftir að spila við Keflavík, Snæfell og FSU.  Keflvíkingar eiga okkur eftir, KR og Hamar.  Ef þessi lið mætast í úrslitakeppninni getur heimavöllurinn verið dýrmætur.

Við hvetjum stuðningsmenn til þess að fjölmenna á þennan mikilvæga nágrannaslag og hvetja okkar menn til dáða.

Fimmtudagurinn 11 mars 2010, Toyota höllin Keflavík kl 19:15!

Áfram Njarðvík!!