Nýtt íþrótta-og útivistarsvæði í Reykjanesbæ var formlega vígt föstudaginn 13. janúar sl. og marka framkvæmdirnar upphaf að gríðarlegri uppbyggingu á fjölþættri aðstöðu fyrir íþróttir og útivist.

Heildarstærð svæðisins er 265.000 fermetrar sem er meiri en Laugardalurinn í Reykjavík. Á svæðinu er gert ráð fyrir 5 æfingavöllum fyrir knattspyrnu, auk aðalleikvangs, frjálsíþróttasvæði, leik- og útivistarsvæði fyrir fjölskylduna, stuttum göngu- og hlaupaleiðum, körfuboltavöllum, félagsaðstöðu og framtíðarbyggingum fyrir íþróttastarf.


Samkvæmt leyfishandbók Knattspyrnusambands Íslands verða öll félög í efstu deild að leika heimaleiki sína á leikvangi sem uppfyllir reglugerðir um Evrópuleiki.
Því hafa bæjaryfirvöld í Reykjanesbæ ákveðið að koma fyrir á einum stað meginsvæði fyrir fótboltaiðkun íþróttafélaganna í bænum.

Svæðinu er skipt í norður og suðursvæði. Á norðursvæðinu verða þrjú æfingasvæði 100x100m hvert, aðalvöllur með stúkubyggingum og svæði fyrir nýtt íþróttamannvirki. Á suðursvæðinu verða tvö æfingasvæði 100x100m auk frjálsíþróttasvæðis. Æfingasvæðin eru sett saman tvö og tvö nema á norðursvæðinu þar sem eitt svæðið  stendur sér.  Milli norður og suðursvæðis er gert ráð fyrir félags/búningshúsi, útileiksvæði og aðstöðu fyrir vélageymslu og tæki sem tilheyra viðhaldi svæðisins.

Aðalvöllurinn verður staðsettur vestan við Reykjaneshöll og stúka austan hans tengist við höllina þar sem gert er ráð fyrir 1500 áhorfendum auk allrar aðstöðu sem krafa er gerð um samkvæmt reglum um Evrópuleiki félagsliða. Þá er möguleiki að tengja stúkubygginguna við Reykjaneshöllina og gera hana að nýjum inngangi fyrir hana.
Síðar meir er möguleiki að byggja áhorfendastúku vestan aðalvallar fyrir allt að 1500 áhorfendur.

Í fyrsta áfanga verður farið í framkvæmdir við æfingasvæði Ungmennafélags Njarðvíkur og gert er ráð fyrir að svæðið verði tilbúið til notkunar um mitt sumar 2006.

Fengið af vef www.rnb.is

Smelltu hér til að sjá yfirlitsmyndband af framtíðar íþrótta- og útvistarsvæði Reykjanesbæjar.