Elvar Már Friðriksson er leikmaður hjá 10 & 11.flokk UMFN og hefur leikið upp alla yngri flokkana með Njarðvík.  Elvar er einnig gríðarlega duglegur að starfa fyrir félagið líkt og félagar hans í 10 & 11 flokk og er þessum köppum margt til lista lagt ( slakir í FIFA 2010 segja heimildir, amk er þjálfarinn þeirra betri! ) Þessi duglegi og magnaði piltur sem er fæddur árið 1994 spilar stöðu leikstjórnanda og er afburða snjall leikmaður. Einar Árni Jóhannsson er aðalþjálfari leikmannsins í vetur og er stíft prógramm hjá þeim köppum.  Foreldrar Elvars Más eru þau Friðrik Pétur Ragnarsson og Svandís Gylfadóttir.

Elvar Már líkt og Sigurður Dagur spilaði í vor sína fyrstu unglingalandsleiki fyrir Íslands hönd með U15 ára liðinu og stóð sig afar vel og var UMFN til mikils sóma.  Í fyrravetur landaði hann tveimur titlum ásamt félögum sínum í UMFN þegar að 10.flokkur varð bikarmeistari og 9.flokkur Íslandsmeistari.  Elvar var lykilmaður í báðum liðunum og stóð fyrir sínu.  Þess má geta að 10.flokkurinn stefnir á að fara á Scania Cup í vor sem verður gríðarlega spennandi verkefni.

Þessi skemmtilegi leikmaður er næsti þáttakandinn í “stutt og laggott” nýjum lið á umfn.is/karfan þar sem hver sem er tengdur körfuboltanum í Njarðvík getur verið tekinn fyrir.  Við óskum Elvari og félögum góðs gengis í vetur....stutt og laggott.

Fullt nafn: Elvar Már Friðriksson.

Staða á vellinum:  Leikstjórnandi.

Getur þú troðið? Nei.

Eftirminnilegasti leikur á ferlinum? Þegar við urðum Íslandsmeistarar 2009 á móti KR í 9.flokk

Furðulegasti liðsfélaginn? Studio MJ. (Magni Þór Jónsson)

Fyrsti þjálfarinn þinn? Brenton og Gunnhildur

Besti leikmaður Íslands frá upphafi karla/kvenna? Jón Arnór Stefánsson og Helena Sverrisdóttir

Fyrirmynd þín á vellinum? Brenton Birmingham

Hverjir verða meistarar í ár í NBA? Detroit Pistons

Lið í enska boltanum? Manchester United !

Ef þú ættir að stofna nýtt körfuboltalið á Íslandi hvað myndi það heita? Þruman.

Hvað er skemmtilegast við körfuboltann? Að vinna.

Hvers vegna eiga stuðningmenn UMFN að mæta á alla leiki? Til þess að styðja við bakið á sínum mönnum.

Við þökkum Elvari fyrir spjallið og óskum honum og félögum hans góðs gengis í vetur.  Jafnframt viljum við minna stuðningsmenn okkar á að fjölmenna á sem flesta leiki okkar iðkenda í vetur.  Það er mikil skemmtun að fylgjast með njarðvískum körfubolta og ekki síður hjá ungviðinu.  Elvar og félagar í 10.flokk spila um næstu helgi í Seljaskóla.

Áfram Njarðvík!

Elvar Már í bikarúrslitaleiknum gegn KR í 10.flokk karla