Sverrir Þór Sverrisson skrifaði í gær undir 2ja ára samning við KKD UMFN og tekur hann við kvennaliði félagsins af Unndóri Sigurðssyni sem lét af störfum nú í vor eftir 3ja ára gott starf.  Sverrir Þór hefur þjálfað yngri flokka hjá UMFN síðustu ár og hefur fyrir nokkru sannað sig sem gríðarlega öflugur þjálfari en hann gerði til dæmis Keflavíkurstúlkur að Íslandsmeisturum árið 2005.  Í samtali við umfn.is sagðist Sverrir vera gríðarlega spenntur fyrir þessu krefjandi verkefni enda væru tækifærin svo sannarlega fyrir hendi í Njarðvík.  "Markmiðin okkar eru skýr en það er að búa til sterkt kvennalið til frambúðar í Njarðvík" sagði Sverrir ákveðinn en hann bætti svo við "leikmenn verða að vera tilbúnir að leggja mun harðar að sér og setja sér háleitari markmið en áður hefur verið gert" Á næstu dögum/vikum verður farið yfir leikmannamálin og sumarvertíðin skipulögð en Sverrir vildi sem minnst segja um þau mál enda blekið vart þornað á samningnum en það verður spennandi að fylgjast með framvindu mála. 

Sverrir Þór mun auk þess að þjálfa kvennaliðið halda áfram með 7 flokk karla (1998) ásamt því að taka við 10.flokk kvenna og stúlknaflokk.  Að gefnu tilefni vildi Sverrir Þór koma því á framfæri að hann hefur ákveðið að leggja skóna á hilluna sem leikmaður en þessi baráttuhundur hefur átt frábæran feril sem leikmaður og unnið til fjölda titla.  "Það var bara kominn tími á það að snúa sér alfarið að þjálfun og vissulega eru það þung spor að hætta að spila en jafnframt spennandi að taka þjálfunina af fullum krafti" sagði Sverrir að lokum.

Kvennastarf UMFN hefur verið í miklum vexti undanfarin ár og er það mikið gleðiefni fyrir deildina að hafa náð samningum við Sverri Þór og félagið væntir mikils af störfum hans. Heimasíðan umfn.is óskar KKD UMFN og Sverri innilega til hamingju með samninginn

Áfram Njarðvík

Samningur í höfn

Jón Guðlaugsson formaður KKD UMFN -Sverrir Þór Sverrisson nýráðinn þjálfari mfl kvenna UMFN - Sigurður H Ólafsson stjórnarmaður