Kynning á þríþraut

Þríþraut er þriggja greina þrekíþrótt sem samanstendur af sundi, hjólreiðum og hlaupi þar sem hver keppnisgrein tekur við af annarri.

Hérlendis er keppt í þremur útfærslum:

• Sprettþraut: 400 m sund, 10 km hjól, 2,5 km hlaup.
• Hálfólympísk þríþraut: 750 m sund, 20 km hjól, 5 km hlaup.
• Ólympísk þríþraut: 1.500 m sund, 40 km hjól, 10 km hlaup.
• Hálfur járnkarl: 1.900 m sund, 90 km hjól, 21,1 km hlaup.
• Járnkarl (e. Ironman): 3,8 km sund, 180 km hjól, 42.2 km hlaup.

Einnig eru til fleiri útfærslur af keppnum þó aðal áherslan sé lögð á þær hefðbundnu. Til eru dæmi um að keppt sé í innanhúss tví- og þríþraut, tvíþraut með ýmsum samsetningum af sundi, hjólreiðum og hlaupi, óvissu þríþraut og ýmislegt fleira.

Keppt er í ólympískri þríþraut á Ólympíuleikum, en þríþraut er mjög ung Ólympíuíþróttagrein sem fyrst var keppt í á Ólympíuleikunum í Sydney árið 2000. Þá er Járnkarl er talin erfiðasta fjölþrautakeppni heims og hefur notið töluverðra vinsælda undanfarin ár.

Þríþraut er fyrir alla
Þríþraut er fjölskyldusport sem byggir á þremur almenningsíþróttum sem flestir hafa stundað að einhverju marki, einhvern tímann á lífsleiðinni.

Hvernig er æft?
Afreks þríþrautafólk er mjög góðu líkamleguformi, og margir áhugamenn velja þríþraut sérstaklega til heilsueflingar. Þríþrautadeild UMFN stendur fyrir reglubundnum æfingum. Æfingarnar eru að jafnaði skipt milli greina, þannig að sérstaklega sé æft í hverri grein fyrir sig.

Þar sem allar þrjár greinarnar, sem þríþrautin samanstendur af, eru úthalds- eða þrekgreinar, er lögð mest áhersla á þrek- og þolæfingar. Þar sem þríþrautafólk þarf að þjálfa þrjár tegundir íþróttagreina fær það góða og fjölbreytta æfingu fyrir allan líkamann.

Hvernig fara keppnir fram?
Allir sem keppa í þríþraut þurfa að hafa undirbúið sig og æft skynsamlega fyrir viðkomandi keppni, vera við góða heilsu og í formi til að ljúka keppninni. Eðli keppninnar er þannig að þrek og þjálfun í hverri grein fyrir sig, auk líkamlegs- og andlegsstyrks til að halda út keppni, er lykilatriði til að ná árangri.

Keppt er í mismunandi vegalengdum eins og kemur fram hér að ofan. Keppni í þríþraut vinnur sá sem fljótastur er að klára alla þrautina, þar með talið skiptinguna (e. transitions) milli sunds, hjólreiða og hlaups. Það er að segja tíminn telur einnig á meðan skipt er milli greina og heildartíminn gildir þar af leiðandi til úrslita.

Hverjir geta keppt?
Mikið er lagt upp úr því að allir geti tekið þátt í þríþrautarkeppnum á vegum þríþrautardeildar UMFN.